GOZA COA LECTURA NO NADAL

Ola a tod@s!

Un ano máis desde a biblioteca queremos propoñervos unhas lecturas que seguro vos van facer máis entretido este Nadal. Con este tempo nada mellor que sentarse tranquilamente cun libro na man. 

Disfrutádeas!

25N

Nesta semana do 25N conmemoramos o Día internacional da Eliminación da Violencia contra a Muller. Desde a Biblioteca levamos xa todo o mes de novembro a colaborar co departamento de Orientación celebrando diversos obradoiros coa temática da violencia de xénero para intentar erradicar esta lacra para a nosa sociedade. Velaquí tedes o mural que o alumnado elaborou para a ocasión:

Entre tod@s podemos cambiar esta situación!

OS DEREITOS DO NENO

Desde a Biblio tamén queremos conmemorar o día dos Dereitos do Neno, para iso tivemos varias exposicións que se poden visitar en calquera dos dous edificios. 

Para @s que non tivestes ocasión de visitalas aquí vai unha mostra:

Ademais, o alumnado de 6º visitou o Concello para explicarnos de forma sinxela en que consisten eses dereitos:

CELEBRACIÓN DO SAMAGOSTO E MES DE NEIRA VILAS

E por fin puidemos celebrar o Samagosto! Desde a Biblioteca e en colaboración con varios departamentos, aportamos unhas historias terroríficas escritas polo alumnado de 2º e 3º de ESO e ambientadas polo alumnado de Música de 4º de ESO que se leron en riguroso directo. Ademais, o alumnado de 1º de ESO, seguindo co mes adicado a Neira Vilas, fixeron unha lectura do relato "Pantasmas" que atopamos na obra "Cartas a Lelo" e que resultou moi apropiado para a ocasión. Aquí vos deixamos a mostra para que o disfrutedes:



Tamén o alumnado de Infantil e Primaria colaborou nesta celebración, elaborando un precioso mural adicado a Neira Vilas e ilustrando fragmentos das súas obras. Velaquí o fabuloso resultado:

VISITA DE NEIRA VILAS

Ola a tod@s!

Neste mes que adicamos a Neira Vilas, queremos compartir con tod@s vós este vídeo dunha das últimas visitas que nos fixo este gran escritor e mellor persoa, na que aproveitamos para poñerlle á nosa Biblioteca o seu nome. Desfrutádeo!

A MAL TEMPO, BOAS LECTURAS!

Seguimos sen celebrar o Samagosto por mor do mal tempo que parece non querer separarse de nós. Sentíndoo moito teremos que agardar aínda unha semana máis para escoitar as historias de terror que o alumnado de 2º e 3º de ESO escribiu para a ocasión e que teñen un acompañamento musical moi especial da man do alumnado de 4º de ESO.

A que si vai acorde co tempo é a biblio de Primaria, que nestes primeiros meses se está a empapar de boas lecturas e de suxestións de todo tipo.

E entrementres o tempo mellora, seguimos coa celebración adicada a Neira Vilas cunha exposición das súas obras na sección de Secundaria e un mural realizado polo alumnado de Primaria.

PREPARANDO O SAMAGOSTO E O MES DE NEIRA VILAS

Na biblio xa estamos preparando o Samagosto que se celebrará a semana que vén. Temos seleccionadas xa unha serie de lecturas escalofriantes que vos xearán o sangue... Ademais a decoración dos espazos vai avanzada, co noso alumnado colaborador e o alumnado de Plástica traballando a todo trapo. Achegádevos!

Tamén vos lembramos que a semana próxima tamén imos comezar o mes de Neira Vilas, ao que lembramos con moito agarimo. Como inicio teremos unha exposición coas súas obras e unha lectura dramatizada do seu relato Pantasmas do libro Cartas a Lelo, a cargo de alumnado de 1º de ESO coincidindo co Samagosto. Iremos colgando máis novas!!

ESCAPE ROOM NO DÍA DA BIBLIOTECA

Seguimos de celebración na Biblioteca!! Tod@s @s que se achegaron onte á biblio levaron algún agasallo e o alumnado de 1º de ESO participou nunha escape room relacionada coa busca de información e o funcionamento e organización da biblioteca. Pasaron un rato estupendo e conseguiron saír a segundos. Ben feito!

                        

FELIZ DÍA DA BIBLIOTECA

Feliz Día da Biblioteca!

Para celebralo Alejandra, Andrea e Arón, do equipo de dinamización da biblioteca elaboraron este vídeo no que realizan unha investigación sobre os hábitos de lectura e o uso da biblio por parte da comunidade educativa. 

Desfrutádeo!

Ademais, tod@s @s que vos acheguedes pola Biblioteca hoxe durante o recreo teredes un agasallo. Non o perdades!

NOVO CURSO, NOVO LEMA!

Ola a tod@s!

Benvidos a este novo curso escolar 2019-20. Como primeira toma de contacto queremos compartir con vós o lema das Bibliotecas Escolares deste ano: Biblioteca Escolar, viveiro de cidadanía que nos vai acompañar durante todo este curso e que vai ser o fío conductor das actividades que realicemos.
Aquí tedes o fabuloso cartel realizado polo ilustrador Óscar Villán e no que podedes ver diversas situacións que unha biblioteca escolar pode facilitar. Disfrutádeo e que realicemos todas elas e algunha máis durante este curso!

LECTURAS PARA O VERÁN

Para rematar este curso, desde a Biblioteca deixámosvos estas recomendacións lectoras para que teñades onde escoller.

Moi bo verán!!!

SEMANA DAS LETRAS//SEMANA CULTURAL

Como sabedes, durante a semana pasada celebramos a Semana Cultural do noso centro, a oitava xa, coincidindo coa Semana das Letras Galegas. Como non podía ser doutra maneira, a Biblioteca tamén estivo presente, colaborando na organización de eventos e actividades do máis dispar.

Para abrir boca, na cerimonia de apertura contamos coa visita de Luis Toxo, amigo de Antonio Fraguas e que nos acercou á vida máis persoal e familiar do homenaxeado nas Letras.

En colaboración cos departamentos de Xeografía e Historia, Música e E. Plástica organizamos as exposicións que se podían visitar na entrada e nos corredores do edificio de Secundaria:

"Poesía feminina e cómic"- Onde o alumnado de 3º fixo unha reinterpretación persoal en cómic de diversos poemas de poetas galegas.

"Evolución dos aparellos de reprodución de audio"- A comunidade educativa aportou diferentes dispositivos de audio que mostran a súa evolución desde os anos 50.

"Persoeiros de Boqueixón: Rei Ballesteros e Gregorio Ferro"- 

 

Como colofón á exposición, organizamos unha mesa redonda coa viúva do escritor Anxo Rei Ballesteros, coa escritora Iolanda Aldrei e o profesor Jorge Conde, que nos mostraron unha cara menos académica do noso persoeiro. Rematou a mesa redonda coa inauguración das novas aulas "Gregorio Ferro" e "Anxo Rei Ballesteros", para o que contamos con música tradicional en directo.

 

 

 




E por se iso non fose pouco, ao longo desta semana o alumnado de 5º de Primaria colaborará co de Infantil cun apadriñamento lector e cunha proxección de contos cooperativos con luz negra e o alumnado de Infantil participará en obradoiros de manualidades, contacontos, lectura e recitado de poemas todo da man das súas familias.

Grandes Letras Galegas!!