EXPURGO

Compartimos con tod@s vós as nosas recomendacións lectoras para que desfrutedes nestas vacacións! Pica na imaxe para ver o que temos preparado!

https://view.genially.com/675ef55bc0848da4a99a5a44/guide-recomendacions-nadal-2024

ASÍ PECHAMOS NOVEMBRO!

Novembro foi un mes moi activo no que, ademais das nosas actividades xa programadas, sumámonos á loita pola  eliminación da violencia contra a muller  cunha exposición temática en EP e na ESO que podedes visitar e aproveitar para levar de préstamo os libros do fondo da nosa biblioteca.

Retrocedendo no tempo, ademais das actividades para celebrar o Día de Neira Vilas, impulsamos o proxecto interdisciplinario Día das Escritoras, que se desenvolveu en dous subproxectos, un en Educación Infantil e Primaria e outro na ESO.  Os detalles pódense ver nas respectivas entradas no blog. O Día das Bibliotecas celebrámolo cunha visita á biblioteca do Concello cos grupos do 2º da ESO e do 6º de EP, onde o alumnado participou dun scape room que versaba sobre os libros que leran, mentres que o 2º de EP visitou a biblioteca Anxo Casal en Santiago de Compostela. Ademais, o equipo da biblioteca de Primaria organizou, xuntamente co profesorado de Plástica e titores/as, a elaboración de marcapáxinas que fixeron os nenos e nenas.

Por outra banda, procuramos que neste día cada un dos grupos da ESO tivera polo menos unha clase na biblioteca podendo facer uso dos recursos deste espazo, dinamizando así o desenvolvemento dos contidos que estaban sendo abordados polo profesorado. 

Finalmente, o alumnado de Plástica fixo unha intervención nos corredores pegando nas paredes pequenos libriños de papiroflexia e frechas feitas con páxinas de libros deteriorados e colocados para expurgo onde anotaron frases destacadas de libros que leron.

Un mes bastante intenso!

3 DE NOVEMBRO, DÍA DE NEIRA VILAS

O día 3 de novembro celebramos o Día de Neira Vilas, entrañable escritor que dá nome á nosa Biblioteca e que sempre  lembramos con moito agarimo. 

Traballouse a súa biografía co alumnado de Educación Infantil e Educación Primaria. Como homenaxe, presentamos os resultados dese pequeno proxecto.

Este vídeo foi elaborado pola titora de 5º de Educación Infantil xunto ao seu alumnado.

Aquí vemos o traballo dos alumnos e alumnas de 1º de EP.

A rapazada do 3º de EP organizouse co seu titor e podedes ver os nenos e nenas lendo poemas nos seguintes vídeos:

                  

 

Temos programada para este mes unha exposición coas súas obras e lecturas dramatizadas de textos extraídos das súas obras, un traballo que será desenvolvido na materia de Lingua Galega.

Neira Vilas foi un dos escritores máis sobranceiros do noso país. A súa vida e a súa obra están marcadas pola emigración, que viviu en primeira persoa en Arxentina e Cuba. Dese sentir nace Memorias dun neno labrego, un dos libros máis famosos das letras galegas. A súa mestría amósase nese e noutros moitos libros que lle valeron o recoñecemento da sociedade galega.

 

Premio Nacional das Letras Españolas 2024

 

DÍA DAS ESCRITORAS NO NOSO CENTRO

 A IX Edición do Día das Escritoras celébrase este ano  o 14 de outubro baixo o lema " A periferia da periferia: Mulleres que miraron ao mundo rural".

"Por iso o próximo 14 de outubro acordarémonos de marabillosas escritoras, poetas e pensadoras como Concha Espiña, Santa Teresa, Dolores Medio, Mariluz Escribano, Margarita Nelken, Rosalía de Castro, María Zambrano, Gabriela Mistral ou Ernestina de Champourcin. Pero tamén das que non puideron selo. Pois elas e non outras son as que mantiveron e manteñen vivo ese mundo rural e a súa cultura, ese campo, esa periferia á que, en xeral, miramos pouco e mal".

Ana Iris Simón, comisaria da IX Edición do Día das Escritoras 2024

A biblioteca do CPI Plurilingüe Antonio Orza Couto participou deste día con diversas actividades nas que foron determinantes as colaboracións do noso equipo de docentes.

Dende as titorías de infantil e primaria, e a materia de inglés, traballáranse, con cada grupo, as distintas autoras falando da súa biografía e lendo algún dos seus textos:

 “Daniela Pirata” e “El Emocionómetro del Inspector Drilo” de Susanna Isern  e “Curriño. O can influencer” de  Ledícia Costas foron os protagonistas en 4º, 5º e 6º de Educación Infantil 

En Educación Primaria, os grupos de 1º A e B gozaran con “Paco”, de Paula Carballeira e “A troglodita” de  Paula Merlán 

Gloria Fuertes co seu “Por parejas” emparellouse co 2º mentres no 3º Mª Elena Walsh deu a volta na cabeza do alumnado con  “El Reino del revés”

O 4º  andaron detrás dos gatiños con  Fina Casalderrey e o seu “O misterio dos fillos da lúa”

María Canosa con “Muriel. Caos en el laboratorio lácteo”  e Marilar Aleixandre con “Robinson contado polas alimarias” foran as autoras escollidas para 5º e 6º, que tamén, como non, traballaron cos  libros de “Harry Potter” de J. K. Rowling.

O resultado do traballo quedou plasmado nun belísimo mural no que implicouse todo o alumnado. 

Podes ver os detalles picando na ligazón:

Día das Escritoras en Infantil e Primaria

https://drive.google.com/drive/folders/1lk08u1oCxhUPujZ1krHIFm3AQUxNaxc2?usp=sharing

A Educación Secundaria viuse inmersa nun proxecto denominado “Quitando o sombreiro ás Sinsombreo”. Un traballo interdisciplinario que tivo como fío condutor “Las Sinsombrero”, tratando de combater a discriminación histórica, reivindicando o labor e o legado literario das mulleres, tantas veces relegadas a un segundo plano ao longo da historia. 

Varios departamentos se implicaron e, ademais de unha guía didáctica que está sendo organizada pola profesora Loaira,  puidemos ver dramatizacións, performances e traballos artísticos.

Na colaxe podedes ter unha idea de como foi a semana e se queredes ver os detalles picade na ligazón 

Día das Escritoras en Secundaria

https://photos.app.goo.gl/N3kdaDj7Qx7mbtyj9

Na materia de Lingua Galega e Literatura traballamos con diálogos creados entre compoñentes da Xeración do 27, centrados na figura e significado das Sinsombrero a través das conversas e da palabra de (diálogo1) Margarita Gil, Rosa Chacel, Dalí e Alberti; (diálogo2) Ernestina de Chapourcín, Luís Cernuda, Rafael Alberti e Vicente Aleixandre; (diálogo3) Maruja Mallo, Lorca e Pilar Salcedo.

    

                

BOAS VINDAS!

 Como cada novo curso, recibimos a visita do alumnado de 1º da ESO!

Nun ambiente distendido e de moita participación, recibiron a formación de novos usuarios e xa saíron cos seus carnés de socios. Agardamos que este sexa un espazo de referencia, aproveitamento e goce para os e as recen chegadas á ESO.

DÍA EUROPEO DAS LINGUAS

 

Os 46 estados membros do Consello de Europa animan a máis de 700 millóns de europeos e europeas a aprenderen máis linguas a calquera idade, dentro e fóra da escola. Convencido de que a diversidade lingüística é unha ferramentapara lograr unha maior comprensión intercultural e un elemento clave na rica herdanza cultural do noso continente, o Consello de Europa promove o plurilingüismo en toda Europa.

Por iniciativa do Consello de Europa en Estrasburgo, o Día europeo das Linguas vense celebrando, desde 2001, o 26 de setembro de cada ano.

Aproveitemos para celebrar o galego, a nosa lingua, e valorar o noso patrimonio.

Día Europeo das Linguas

CHUS PATO PREMIO NACIONAL DE POESÍA 2024

 A calidade da produción poética galega acada un ano máis o Premio Nacional de Poesía 2024, nesta ocasión para Chus Pato.

  

O xurado considera a súa obra Sonora como "experimental, unha expansiva e concentrada conversación entre o poema e a morte, aquela que, trala orfandadeda nai, arrastra os lectores cara aos abismos da propia linaxe" e di do poemario que "crea espazos textuais ateigados de fugas: retóricas, semánticas, capaces de hibridar distintos códigos nos que se desprega toda a súa inextinguible potencia sonora".

Premio Nacional Poesía 2024

BEA LEMA PREMIO NACIONAL DO CÓMIC 2024

 A ilustradora e autora de cómic Bea Lema Rivera, nada na Coruña en 1985, foi galardoada co Premio Nacional do Cómic 2024.

O xurado destacou O corpo de Cristo por ser "unha obra innovadora, arriscada no formal, con texturas e composicións que trascenden as técnicas máis utilizadas sen renunciar ao uso do humor e a unha mirada poética".

                 

Premio Nacional Cómic 2024

 

REUNIÓN DOS GRUPOS DE CLUB DE LECTURA MARAVEXÁS

 Os grupos de alumnado do Club de Lectura Maravexás do CPIP Antonio Orza Couto reuníronse por última vez este curso para intercambiar impresións sobre os libros que lles tocou ler: Golpes de luz, de Ledicia Costas; Campus Morte, de Lito Vila; e a edición ilustrada por Iria Aldegunde de Memorias dun neno labrego. Dos encontros saíron interesantes comentarios arredor das tramas, pero tamén sobre os procesos de escrita dos nosos autores e autoras.

A sesión rematou cunha entrega de pequenos agasallos pola súa participación e implicación neste programa, así como na vida da nosa Biblioteca.

 Parabéns ao noso alumnado pola intensidade coa que participaron neste proceso lector!

 

CHARLA CON NEE BARROS

 

              

O luns 10 de xuño visitou a biblioteca Xosé Neira Vilas do noso centro Nee Barros, autor do libro Identidade que esta avaliación leu o alumnado de 3ª ESO na materia de Lingua Galega e Literatura. Nee falou co alumnado sobre o seu libro e explicou tamén algúns conceptos ligados á identidade de xénero dunha maneira amena e próxima, e cunha interacción continua co alumnado.  

Agradecemos a Nee a visita, a charla e a súa contribución a un ensino público de calidade baseado no respecto e a igualdade.

CELEBRANDO O DÍA DAS LETRAS GALEGAS 2024

Celebramos o Día das Letras Galegas con moitas actividades e, como non podía ser doutra maneira, a Biblioteca tamén estivo presente, colaborando na organización de eventos e propostas.

En colaboración cos departamentos de Lingua Galega e Plástica organizamos a exposición no corredor da planta baixa do edificio de Secundaria. Aínda se pode apreciar os acrósticos e bandas deseñadas. 

  
Nos corredores da segunda planta de Secundaria e no edificio da E. Primaria tamén houbo unha exposición sobre a autora homenaxeada, Luísa Villalta. No salón de actos, decorado con un precioso panel realizado por Yanet e palabras galegas ilustradas polo alumando,  puidemos escoitar a ilustradora IRIA ALDEGUNDE, que veunos a falar da súa adaptación o cómic de MEMORIAS DUN NENO LABREGO. Finalmente entregáronse os premios do X Certame literario q leva o nome do escritor X. NEIRA VILAS.

DÍA DO LIBRO 2024

 UNHA MATERIA, UN LIBRO

Para celebrar o Día do libro convidamos o noso alumnado de Secundaria a gravar unha recomendación lectora e ao profesorado de todo o Centro a participar na actividade  “Unha Materia, Un Libro”. 

O resultado quedou plasmado neste fermoso vídeo e nunha exposición de libros con títulos moi orixinais dos nosos fondos. 

Na Educación Primaria  e Educación Infantil desenvolveranse dúas actividades:  “Comparte un Libro” - e “Apadriñamento lector”. Na primeira o alumnado compartiu un libro e despois, durante a hora de lectura comentou o libro que leu.  En “Apadriñamento lector” - o alumnado de 3º a 6º contou contos ao alumnado de Infantil a 2º.

Celebremos esta data tan bonita collendo un dos libros recomendados!

OBRADOIRO DE BANDA DESEÑADA CON ALEXANDRE SENANDE

Este mércores contamos no CPIP Antonio Orza Couto coa visita do ilustrador Alexandre Senande que veu darlle un obradoiro de Banda Deseñada ao alumnado de 1º ESO. O ilustrador de Sentinelas da lúa carmesí, xa coñecido polas alumnas do noso Club de Lectura, compartiu algunhas das súas técnicas co alumnado de 1ºESO nunha sesión práctica na que estiveron traballando e desfrutando a un tempo e que deu lugar a resultados moi satisfactorios. 

​Parabéns a Alexandre e ao noso alumnado pola súa implicación recíproca na actividade. Parece que hai canteira da ilustración no Orza Couto!

REUNIÓNS CLUB DE LECTURA

 Rematamos a avaliación coas reunións do Club de Lectura do alumnado de 3º e 4º ESO para comentar os libros Campus Morte, de Lito Vila Baleato e Golpes de luz, de Ledicia Costas. 

    

PARABÉNS ao noso alumnado lector!!!

ESTE ANO CELEBRAMOS POR PRIMEIRA VEZ O DÍA DO CÓMIC!

O 17 de marzo, Día do Cómic, é unha data especialmente importante para nós, xa que coincide co lema das Bibliotecas Escolares "Unha Biblioteca Escolar en Viñetas".

Dende a biblioteca, organizamos unha exposición de cómics dos nosos fondos (principalmente novas adquisicións) nos idiomas galego, castelán, francés e inglés.

Convidamos o alumnado a visitar a exposición e animarse a levar un cómic para ler nas vacacións da Semana Santa.

 

CLUB DE LECTURA ALUMNADO 2ESO

 Xuntanza co alumnado do club de lectura de 2ESO para comentar a lectura Sentinelas da lúa carmesí, unha lectura de banda deseñada de Andrés Castro, Ozo Perozo e Alexandre Senande, publicada pola editorial Galaxia e que encheu ás nosas alumnas curiosidades e fantasías.

A vindeira lectura... unha nova banda deseñada, neste caso dun clásico que nos toca moi de preto, Memorias dun neno labrego, de Xosé Neira Vilas, agora en versión ilustrada de Iria Aldegunde e editada por Galaxia.
 

ROSALIADA - celebración do DÍA DE ROSALÍA

 O venres 23 de febreiro celebramos o Día de Rosalía de Castro cun acto no que participaron os diferentes grupos da ESO e que se desenvolveu nas dúas últimas sesións do día no salón de actos.

O alumnado de 1º e 2º ESO fixo caligramas cos textos de Rosalía nas clases de diferentes materias e titorías, presentaron o acto e mesmo fixeron a lectura do poema "o cravo".

    

  

 O alumnado de 3ºESO leu Lieders e o manifesto da Asociación de Escritores en Lingua Galega, elaborado por Carlos Callón para este día. 

                 

O alumnado de 4ESO interpretou ao piano e frauta o poema Negra sombra e cantaron e bailaron a ritmo de pandeiretas "Cantan os galos pr'o día".

Parabéns ao alumnado e profesorado do noso centro implicado na celebración deste día tan importante para a cultura e identidade galegas.